Zèt dich nèèr biej 't brook en kiek nao de locht
Ich wil mèt dich wèdde de bès zuu verkocht
De zòn pùutst her strèèlkes, det deit ze geriègeld
Ter wiel det ze zich in 't watervlak spegelt
De zwane, de ène ze sjrieve de zinne
De wind en 't reet guun e leejdsje verzinne
Det weert aan 'e sjuunheid van Miève gewied
En wèè er nao lùustert gereekt et nuuts kwiet
Riej duur Miève-Raoj, gank nòg lever te voot
Stap aaf, blief ins stuun, kiek rònd, lùuster good
Dan zils te beseffe dan zils te verstuun
Det de maker van alles hiej ze bèst hèèt geduun
En geis te uuts weg, zelfs hièl wied van hùus
Nao dit dèrp kims te trèig, want det blieft dienen thùus
Wat mier nao 't uuste dao priekt 't kastièl
Mèt grachten en tuures, e machtig gehiel
Kiek ònner de port gederig en trùuw
Wicht sjildknaap mèt pèèrd en 'n prachtige vruiw
De ridder sjrèèjt nader in zilver en wit
Ter wiel op z'n vùust e ne jachtvalk zit
En ederein bòkt zich, is er klein of hièl rùuw
En ederein druimt, zuu waas et toon zuu is et nùuw
Ich staon plots te zwaèje nao ruiter en pèèrd
En wiej Willem zèèt et is't kieke wèèrd
Want nùuw iève later in die wèlvende pracht
Hèèt minnige jièger 't wild nèèrgelagd
Hubertus besjermt 't hièle gebiere
En daovër wilt men em jaorliks veriere
Dao steit in Nèèrglabbik gein inkel palies
Mer es geneter vins te'r 'n echt parëdies
E krònkelend lint, vèèl green ròntëlòm,
Leipt kabbelend wiejer en in Èlekòm
Vertèlle de mièles uis hièl auw verhale
Van mollers die't kuure hiej meeste male
De wichter ze vange nòg altied de vèskes
En lore nao't vinkske verstopt in 'e bèskes
De Abièk diej is in e strièk hiej gebuure
En zal mèt 'r sjuunheid uis blieve bekuure
Dao waas ins e volk hièl sterk en hièl strùus
Det zòcht en det vòn uuts hiej zienen thùus
Det buiwde, det lèèfde en sòms mees et vechte
Det lierde z'n wichter hin plichten en rechte
Hinne kièning dèè hèèt hiej z'n rèstplaats gevònne
En blieft zuu mèt Wiesjage ièvig verbònne
Uis dèrpe zeen bùutegewuun intressant
Zuu lekker gezellig en sòms wat pikant